Zvikwambo Zvevayimbi! :- mfeçane by the maumau, onelove album review -: Shingirayi Chapeyama, Mwana wamayi, uya watakambonzwa nezvake mugore ra1998 achinzi iye Question I, adzoka nechikwata chake chiya-chiya chinonzi Mau-Mau nedambarefu rinotapira chaizvo rinemusoro wokuti "Mfeçane". Mfeçane zvichireva izvo shanduko yezvunhu izvo zvandakakwanisa kuvona pakaburwa mutakunanzva uyu. MFEÇANE- dambarefu, 2001 side one side two 1. mazwi ekutanga {nhau} 7. ivhu 2. mau mau yazodzoka 8. tabvuma 3. goridhe 9. wadarireyi 4. maggie mudiwa 10. mau mau '98 (Chirungu) 5. amai ethiopia 11. mau mau '98 (Chivanhu) 6. mazwi epakati... tivhi 12. mazwi ekupedzesera... tiudzeyi Pamazwi ekutanga tinonzwa chidimbu chokutaura chinoita sokunge nhau dzepa"Radio Zimbabwe" uyu Mwana wamayi achidzipakura, anotaura zvishoma nezvokunetseka nekupiringishwa kwakaitwa chikwata chake pakuedza kubura dambarefu iri. Panondizipa ndeapo paanozviti Lovemore NyikaYedu, zvinoratidzawo kuda kunoitwa nyika nemuchinda uyu. Iyo inonzi iyo "Title track" muchirungu padambarefu iri inziyo inonzi "Mau Mau Yazodzoka" iyo isina kunyanya kufarirwa navanhu, asi ndinofunga kuti dai "goridhe" kana imwe yenziyo dzirimuruvara rwutsvuku patafura iripamusoro apa yakaitwa title- MauMau yaizonakidza ruzhinji! Ndinodaro nokuti "goridhe" inemazwi anoburitsa chokwadi chezviitiko zvemuno muZimbahwe uye Africa panyaya dzovanoita zvouwori kuti vawane upfumi neavo varipasi vanosara vachiwedzerwa kutambura. Inotaura pamusoro pemadayamondi ekuCongo, maitiro ama"manager" mumabhangi nekuita kwevasikana vanoda shagi! "Zvikara zvandowona zvakafanana nevanhu / vakatsokerana murokesheni setsuro / Ndatsamwa ndotanga kutuka madzitateguru / kundisiya ndinemwari, wandisingaziwe / Ndingavimbe sei nezvakauya nevamwe / Mweya wangu ganda rangu raramba kutsikirirwa / Vakadzidza vachinyepa.. / nyepa mumapepa / Iko kumamisha mhuri dzorara nenzara / Zvataimbova vanamambo nhasi tavavaranda..." "maggie mudiwa" chimbo chakasiyana zvakanyanya nedzimwe padambarefu iri. Chinoyenderana nemusambo uya unonzi "ragga". "Tisati tasvika kuimwe rhumu ngatitange / Mukicheni, titsvage chinhu chekuruma seOrenji / Chandinoda mukaka, chokoleti yakasviba kuti NDOO / Uchiwawa semukaka wakaasvika... " Mamwe emazwi aripanziyo yacho apo anenge achitaurira mudiwa wake zvaanoda kwaari uye achipawo vateereri zvokuzofadza vadiwa vavo nazvo "..ah mudiwa dhiya, swedera pedyo... candy keke sweet lavho.." Kambo kokupedzisira kandakayisa muruvara rwutsvuku kandinoona kuti kanotapira ndeako kanonzi "Ivhu". Ndiko kambo kanotaura zvinhu sezvazviri pasina kana kuvanza. Kanotaura pamusoro pekubatwa kwevanhukadzi uko kusingaratidze kukosha kwavo. Kudzikisirwa kwevakadzi kwaanotaura kunoitika pakubatwa chibharo uye kusabatwa zvakanaka kumabasa. Unye hwokuzvondwa kwake unobva waburitswa paanotaura izwi rinoshandiswa kusvora vanhukadzi, asi anozopedza hake nziyo iyi nekukumbirira ruregerero varume vose vakatadzira vanhukadzi! Dzimwe nziyo handisi kuzodzipakura sedzandataura pamusoro asi dzinozipawo. "Tabvuma" inotaura kuzvipira kwechikwata cheMauMau nechimwe chidimbu chinoti: "Ndinovhundutsa competition / seyimwe Party / dzimara mati Mhai, chinja mhani / Toda kumeka mari kuti tipfeke -ARMANI / Gutu to Lalapansi ... / Mazvinda nemaNdex, magamba sanaChinx / Mwedzi paunopera tonoCollecta macheques / Tichifamba, tichidada tichibhamba semadhadha / ...Nemari yeOverseas vamwe vedu varasika / mumasango vachiNoser semabhunu mumaguta / Imbwa kuramba bvuta, hunge yakaguta... " "Wadarireyi" chimbo cherudo chaanoimbira mudiwa wake uyo waaidisisa chaizvo asi musikana uyu aiva nemumwe waakazotorwa naye: "Pakutangisisa ndakarasiswa neStyra / mapfekero ako, hembe dzako, bvudzi rako / zvese zvakandiwandira dzimara ndava bofu / Ukati apa ndaiti Eeh, ukati uku ndaiti Hoo / Semombe yakabopwa pagejo ndirimuforo / ndopandakazonzwa kuti paiva nomumwe / mumwewo, ainombora mupoto yandaiti yangu / mumwewo, airawura mudziva randaiti rangu / mumwewo, aikutsvoda dama randaiti rangu / mumwewo, akapindira nyaya dzandaiti dzangu / Choto chaimbova nemoto ndokuti NHOO / semvura yehasha yafashaira mupoto / Ziso NDOO netsvuka muviri kushaya simba / Kupera semunhu asvetwa ropa nemuroyi / Kana rudo chiri chirwere munhukadzi uchazviwona..." "Amai Ethiopia" ndiyo nziyo inosiririsa panedzose nziripano, iyo inotaura nezvekutambura kurikuita Africa "Zvidzidzo zvedu zvese zvinobva kwevarungu / ndosaka, vatema tichichiva zvechirungu / KuSomalia vapedzana nepfuti / dzakatengwa Ingirandi (England), nemari yebangi reSwitsarandi (Switzerland) / Ndopatinogwadamira iro Worldi Bangi / Tipeyi chikwereti chekubhadhara chimwe / vana vafa nayo nzara, chirwere chapedza mhuri / totorarama nemari yevarungu." "mazwi akadzama sepacherwa nefoshoro" ndiwo mamiriro edzimbo mbiri dzokupedzisira paMfeçane. "mau mau '98", yatinopihwa muchirungu nemuchivanhu ndiyo yakativhura nzeve mugore ra1998 apo chikwata ichi chakabura 'single' yenziyo iyi inotaura nezvakamirira iro zita rokuti mau-mau nekuparura kuvateereri kuti rakabvepi: "Pfungwa dzenyu tinovhura --- muchitamba zvenyu / Zita ndakatora kubva kune vamwe vanhu / Magamba aichema akabata, bazooka / Magandanga mumasango, vhudzi semasango / Vachirwira nyika saka usandiudze tsvina / ...Ndini Shingirayi, ndini muyanzanisi / nhunzvatunzva mochema, mopera / senyika yeChechnya / saka simudza musoro, musana woti twasa / Mau Mau painosvika tumaBhoyi tomhanya-mhanya.."   2G5